|
بلوچستانءِ تاریخ
نبیسوک: میرگل خان نصیر
رجانکار: ناصر محتشمی
میرنصیرخانءِ آیگ مان بلوچستانءَ
وھدیکہ
نادرشاہءِ سردار و سروکان رَند چہ آییءِ مرکا وت مان وت کپت اَنت،
میرنصیرخان گون شاہ ولیخان بامیزئیءِ کمکا، میرکمال خان اَھلتاززئی،
سردار سلطان زھرو بنگلزئی، علی دربان، ملامھرعلی و اے دگہ وتی بیل و
سنگتاں کہ نادرشاہءِ کمپءَ زندان اِتنت، زرت و تتک اَنت ـ
شیراز کہ سر بوت اَنت، میرنصیرخانءَ وتی لشکرءِ سروک مھرعلیءَ دیم پہ
قندھار راہ دات کہ آییءِ مات و اے دگہ مردمان قندھار نادرشاہءِ زندانءَ
بنداِتنت، آییءِ جند گوں وتی سنگتاں چہ کیچ و مکرانءِ راہءَ آتک و وت
اِش حبءِ کورا رسینت و چٹہءِ دمگا کدخدا باھوٹءِ مھمان بوت اَنت ـ
کدخدا باھوٹ چست بوت و وتی کساسءَ مھمانداری کت اَنت ـ میرنصیرخان چنت
روچا کدخداءِ مھمان بوت و پدا دیم پہ سند شت و کلوڑانی میار بوت ـ دو
سال خداآبادءِ دمگا کلوڑانی کِرّا داشتی ـ
سردارانی کاگد و کراچ گون میرنصیرخان
اے دوران میرمحبت خان وتی سردارانءَ باز دلسیاہ کتگ اَت ـ سرداران چہ
آیی بیزار بوتگ اِتنت و شھر و بازارءِ دیما گوانک اِش جت و پہ آییءِ
تھتءِ پروشگا وتی سرین اِش بستگ اَت ـ میرمحبت خان چہ آیانی دیمگیریءَ
ناتوان و آجزاَت ـ میرنصیرخان گون سلطان زھرو بنگلزئی و میرکمال خان
اَھلتاززئیءِ کمکا گوں سرداران کاگد و کراچ کت و گوں آیان کول و کرار
بئيگااَت ـ احمدشاہ ابدالی مان افغانستان نادرشاہءِ جنگجویں لشکرا پروش
داتگ اَت و آزاتیں حکومتے ماں اودا جوڑی کتگ اَت ـ شاہ ولیخان بامی زئی
میرنصیرخانءَ وتی چُک ھساب کت و احمدشاہ ابدالیءِ وزیری کت ـ اے وھد پہ
میرنصیرخان تلاھیں وھدے اَت ـ ھمے ڈول میرنصیرخان گون کاگد و کراچ گوں
وتی سرداران ھال و اھوال کنگااَت و وتی نیمگا ترّاینتگ اِتنتی ـ مان
قندھار گون شاہ ولیخانءِ وزیرءِ کمکا احمدشاہ ابدالیءِ اعتمادی ھم جلب
کتگ اَت ـ آسرا کہ درستيں کار و بار گیشینگ بوت اَنت، شاہ ولیخان
میرنصیرخانءَ قندھار لوٹاینت ـ سال 1747 ءَ میرنصیرخان گون سرداران ھور
میرمحبت خانءِ ھلاپءَ شکایتے نبشت، میرنصیرخانءِ جند قندھار شت و شاہ
ولیخانءَ پیش کت ـ
احمدشاہءِ ناراضی چہ میرمحبت خان
وھدیکہ میرمحبت خان چہ سردارانی چیرین کاران کہ پہ آییءِ ھلاپءَ کنگا
اِتنت سھی بوت، سک ترس اِت و ھبکہ بوت ـ و گشتی بہ مرتینان بلے اے
کاراون مہ کتیں ـ میرمحبت خان میرسلطان قائم خان شاھوانیءَ وکیل کت و
قندھار راہ دات کہ بروت شاہ ولیخانءَ بگشیت، چوش کہ میرنصیرخان گشگا
اِنت اے ڈول نہ اِنت ـ میرسلطان قائم خان شاھوانی سکیں ھژار و زانتکارے
اَت ـ وھدیکہ قندھار پج اِت، چہ اولا سرپدات کہ احمدشاہ ابدالیءِ دربار
میرمحبت خانءِ ھلاپءَ شورینگ بوتگ ـ دومی روچا کہ احمدشاہ ابدالیءِ
دربارا شت گوں زانتکاری و دانشمندی وتا میرمحبت خانءِ وفادرین مردمے
زاھری کت و گون احمدشاہ ابدالی گشتی کہ من پہ ھیرین کارے آتکگاں ـ تو
بزان احمدشاہ ابدالی میرمحبت خانءِ جنکءَ بی بی جانءَ سانگ بکن ـ بی بی
جان میرگوھرام خانءِ جنوزام اَت ـ احمدشاہ چہ اے سانگءَ سک وشھال بوت،
منّتی و مزنيں عزت و احترامے میرقائم خان شاھوانیءَ داتی و پدا دیم پہ
کلات رھادگی کت ـ رند چہ اے کارا احمدشاہءِ ھیال چہ شاہ ولی خان و
میرنصیرانءِ تماھان بدل اِت ـ
میرسلطان قائم خان وتی منّا کامیاب کلاتا واتر بوت ـ بلے وھدیکہ
میرمحبت خان اے ھبرا اِشکت کہ میرسلطان قائم خان احمدشاہ ابدالیءَ پہ
بی بی جان زامات کتگ سک ھژم گپت، میرمحبت خان، میرسلطان قائم خان
شاھوانیءَ تھلانک دیان چہ کلاتءَ ڈن کت ـ میرمحبت خان اے وڑین سانگبندی
و نامگپتیءَ پہ وتی جنکا سکین مزنیں توھینے زانت و چہ ھمدا وتی
سیالداری گون احمدشاہ آسر کت ـ
احمدشاہ ابدالیءِ اُروش کلاتءِ سرا
میرمحبت خان گون اے بدین کارا احمدشاہءَ ھژم دات ـ پرچے کہ احمدشاہ ھم
اے گپءَ پہ وت بے عزتی زانت و شاہ ولیخان وزیر ھم اے آسءَ ھپ کنان بوت
تا کہ احمدشاہ پہ کلاتءِ اروش کنگا جاری و ساری بوت ـ آسرا احمدشاہ
ابدالی سال 1748 ءَ گوں یک جنگولیں لشکرے کلاتءِ سرا اروشی کت ـ
میرمحبت خان وتی سردارانءَ حکم دات کہ لشکرے مچ بکن اَنت، بلے میرسلطان
قائم خان شاھوانی کہ آییءِ دست راست و مزنين زھم جنے اَت چہ آیی دلگران
و یک گور بوتگ اَت ـ اے دگہ سرداران ھم چہ اولا چہ آیی دلگران و گون
میرنصیرخان ھمراہ اِتنت ـ ابید چہ محمد شئی و آییءِ قبیلہ دگہ ھچ کس
گون میرمحبت خان ھمراہ نہ بوت ـ آسرا گوں خانءِ حکمءَ سردار محمدشئی
گوں وتی قبیلہءَ و کلاتءِ چنت دگہ کسانیں بی نام و توارین قبایل چوش کہ
لانگو، نیچاری، دھوار و دگہ لھتے میرمحبت خانءِ بیرک زرت و مان تلی
مستونگ مچ بوت اَنت ـ
میرمحبت خان اے کسانیں لشکرا زرت چہ مستونگ درآتک و گوں احمدشاہءِ
لشکرا دیم پہ دیم بوت ـ محمدشئیءِ قبیلہ گوں احمدشاہءِ لشکرا باز جنگ
دات، بلے گیشتر احمدشاہءِ بزین لشکرءِ دیما داشتی نہ کت ـ میرمحبت خان
پروش وارت و کلاتءِ نیمگا پچ ترّاِت و سردار محمدشئی گون وتی چنت
کماشءَ دزگیر کنگ بوت ـ احمدشاہ مستونگءَ چتر پیچ کت و بازینے چہ
محمدشئیءِ قبیلہءَ کشگ و آیانی ھست و نیست تاراج کنگ بوت اَنت ـ
احمدشاہ چنت کسءَ کہ چہ محمدشئی قبیلہءَ دزگیر کتگ اِتنت گون وت زرت و
دیم پہ کلات رھادگ گپت اَنت ـ
میرمحبت خانءَ گیشتر جنگ کنگءِ واک نیست اَت ـ پہ ھم اِش کلاتءِ کلاتءِ
تھا چیرات ـ حاجی رحیم بابی احمدشاہءِ مرشدءَ قرآن زرت و منگوچرءِ دمگا
احمدشاہءِ لشکرءِ دیما اوشتات ـ احمدشاہ چہ اپسءِ سرا ایر کپت قرآن چک
اِت و پہ قرآنءِ احترامءَ میرمحبت خان پھل کت و منگوچر پچ ترّاِت و دیم
پہ قندھار رھادگ گپت ـ البت آ چنت کماشیں بلوچ کہ دزگیر کنگ بوتگ اِتنت
گوں وت زرت و قندھار برت اَنت و چہ قندھار کابل برت اَنتی ـ
میرمحبت خانءِ پشومانی
میرمحبت خان چہ احمدشاہءِ اروشءَ پہ ھوش آتک و اپسوز ورگا لگ اِت کہ
پرچے میرسلطان قائم خان شاھوانیءِ نیکیں سوج اون نہ گپتگ ـ نون ابید چہ
احمدشاہءِ کمکا آییءِ توان نہ اَت کہ بلوچستانءَ حکومتی بکنت ـ
احمدشاہءِ راضی کنگ پہ سردارانی مقابلہ کنگا الّمی اَت ـ آسرا میرمحبت
خان وتی جنکا بی بی جانءَ گون آخوند محمد حیات ھمراہ کت غزنی احمدشاہءِ
خدمتءَ راہ دات ـ احمدشاہ بی بی جانءَ نکاح کت و سردار محمدشئی و دگہ
ھر بلوچے کہ گپتگ اِتی آزاتی کت اَنت ـ آخوند محمد حیات آیانءَ زرت و
کلات پچ ترّاِت ـ
ھرچہ دانا کُنَد کُنَد نادان لیک بعد از خرابی بسیار
میرمحبت خانءِ دزگیری
سال 49- 1748 ءَ رند چہ میرمحبت خان و احمدشاہءِ سانگبندیءَ آیانی
سیالداری شر بوت ـ بلے چنت وھدا رند میرنصیرخان و شاہ ولیخان وزیر پہ
وتی مکسدانی پورہ کنگا، دربارءِ تھا ھال اِش پرّاینت کہ میرمحبت خان سر
عام گوانک جتگ کہ من وتی زھمءَ ایر نہ کنان تا ھما وھدی کہ مستونگءِ
تاراج کنگءِ بیڑا چہ احمدشاہ نگران، و میرمحبت خان بلوچستانءِ تھا
چیروکانی گون سرداران احمدشاہءِ پروش دئیگءِ ھلاپءَ چن و لانچ کنگااِنت
ـ گوں دروگ قبایلانءَ احمدشاہءِ ھلاپءَ چست کنگااِنت ـ اے درستیں گپ و
ھال چہ میر سلطان قائم خان شاھوانیءِ نیمگا کہ چہ میرمحبت خان ناراض
بوتگ اَت و گون میرنصیرخان بستگ اِتی چہ ھمایی نیمگا قندھار سر بوت
اَنت ـ کم کم اے ھبران کہ احمدشاہ ابدالیءِ گوشا رس اِتنت، احمدشاہ
ابدالی میرمحبت خانءَ حکم دات کہ گون وتی درستیں سرداران بیا قندھار و
اے بھتامانءَ پکا بکن ـ
میرمحبت خان پہ ناکشیں دلے قندھار پُج اِت ـ احمدشاہ ابدالی پہ ھمے
ھاترا دربار عام دات و میرمحبت خان میاربارین کسے وڑا پیش بوت ـ
احمدشاہ ابدالی چہ آیی جست کت، اے گپ راستے کہ تو گشتگ تا ھما وھدی کہ
مستونگءِ تارج کنگءِ بیڑا چہ احمدشاہ نہ گران زھما ایر نہ کناں؟ ـ
میرمحبت خان اے گپا پہ وت نہ گپت ـ بلے اسماعیل خان باروزئیءَ شھادت
دات کہ راستے میرمحبت خان اے گپا گشتگ ـ احمدشاہ پسہ دات و گشتی تو
بیگانہ اےءِ تئی گپ قبول نہ اِنت ـ میرنصیرخان پادآتک و گشتی: اے گپاں
میرمحبت خانءِ گپان اَنت ـ احمدشاہ جواب دات و گشتی: تو مدعیءِ تئی ھبر
ھم قبول نہ اِنت ـ بلے اگر زھرو بہ گشیت آییءِ ھبرا قبول کناں ـ سلطان
زھرو بنگلزئی یک سکیں راستگو و شریف این مردے اَت، و احمدشاہ آییءِ
احترامءَ کت و آییءِ گپانی سرا یکینی ھست اَت ـ سلطان زھرو بنگلزئی
پادآتک و گشتی: ھر چہ کہ میرنصیرخان میرمحبت خانءِ باروا گون بادشاہءَ
گشتگ، راست اَنت ـ
احمدشاہ دیما گون میرمحبت خان کت و گشتی: چوش کہ زانگ بیت تو مئی
حکومتءِ پروشگءِ چن و لانچءَ بوتگءِ ـ احمدشاہ حکم دات کہ گرپتاری کن
اِت ـ میرمحبت خان گرپتار و زندان کنگ بوت ـ و میرنصیرخان گون درستیں
سردارانی تپاکیءَ کلاتءِ خان گچیں کنگ بوت ـ احمدشاہ میرنصیرخانءَ
مزنیں عزت و شرپے دات و ھمراہ گون سرداران دیم پہ کلات راھی دات ـ
میرمحبت خانءِ کشگ یا قتل
چنت وھدا رند احمدشاہ قندھارءِ کلاتءَ و میرمحبت خانءَ کہ یک زندانیءِ
وڑا، خان خانانی دستا دات اَنت و وت شت کابل ـ رند چہ یک سالے احمدشاہ
چہ خان خانان شک بوت پہ اے ھاترا کہ آییءِ ھلاپءَ سازش کنگااِنت ـ خان
خانان گرگ و ھور گون میرمحبت خان قندھارءِ کلاتءِ تھا بند کنگ بوت ـ
وھدیکہ خان خانانءِ سرا جرم ثابت بوت، احمدشاہ ابدالی، شاہ ولیخان
وزیرا حکم دات کہ خان خانانءِ سرا بجن و بیار ـ شاہ ولیخان وزیر گون
میرنصیرخان کول کتگ اَت کہ میرمحبت خانءَ چہ آییءِ راہءِ سرا دور کنت ـ
مروچی شاہ ولیخانءَ موہ رستگ اَت، چیروکانی گون جلادءَ گشتی ھر دوکانی
سرانءَ بجن ـ وھدیکہ دو سر احمدشاہءَ پیش کنگ بوت، سک ھیران بوت و جستی
کت دومی سر کئیگ اِنت، پسہ دئیگ بوت کہ: خان بلوچءِ سراِن "بزاں
میرمحبت خانءِ سران" ـ احمدشاہ کہ اے ھبرا اِشکت سک ھژم گپت، بلے کارے
کہ بوتگ نون ھچ کنگ نہ بیت ـ احمدشاہ حکم دات کہ میرمحبت خانءِ جسدءَ
پہ عزت و احترام ببراِت و کلات سر کن اِت ـ بازینے چہ احمدشاہءِ
دربارءِ کماش و معتبران میرمحبت خانءِ لاش زرت دیم پہ کلات رھادگ گپت
اَنت ـ آیان خان بلوچ میرمحبت خانءِ لاش چہ قندر برت و کلاتا کل کت ـ
میرمحبت خانءِ زمانگءِ حکومتیءِ سرا چمشانکے
میرمحبت خان سال 1749 ءَ دومی رندا چہ کلاتءِ خانیءَ چست کنگ بوت ـ سال
1750 ءَ احمدشاہءِ زندانءَ مان قندھار کشگ بوت ـ میرمحبت خان اولی برا
کساس دو سال و دومی برا کساس سیزدہ سال کلاتءِ حکومت بوتگ ـ اے
دراجکشیں وھدا میرمحبت خان سردارانی دستا یک لیبوکے وڑااَت ـ ھچ کارے
پہ ملک و مردمانی دیمرویی و گھبودیءَ نہ کتی و گیشترین وھدا میری
کلاتءِ تھا نشتگ اَت ـ میرمحبت خان سکیں جاندوز و جاندوستیں مردے اَت ـ
آییءِ حکومتیءِ وھدا بلوچ قبایل سک تنگدست گژنگ اِتنت ـ اے زمانگ جیڑہ
و برات کشیءِ زمانگ اَت ـ امنیت نیست اَت، ڈنگی و رھزنی سر عام اَت، و
قبایل چہ آیی ناراض و وتا گستاہءِ اِش کتگ اَت ـ میرمحبت خان بلوچانی
تھا اولی حاکم اَت کہ اول سرا نادرشاہ ایرانءِ شاہءِ و پدا احمدشاہ
ابدالی اوگانستانءِ شاہءِ ایردستی اے ڈول منّ اِت کہ سالے بیست ھزار
روپیہ مالیات، جنگءِ وھدا دوازدہ ھزار کس ھر سال افغانستانءِ شاہءَ
بدات ـ
آ زمانگءَ غم لشکرءِ مکسد بزان جنگی لشکرءِ کمک گشگ بوت کہ ایردستین
حکومتءَ چہ وتی قبایلءَ مچ کت و جنگءِ وھدا کمکءِ وڑا پہ بالادستیں
حکومتءَ راہ دات و سان بادشاہءِ بھر چہ اے لشکرءَ دوازدہ یک اَت کہ ھر
سال چہ بلوچان مچے کت و پہ بالادست ترین حکومتءَ راھے دات اَنت ـ المّی
اَت کہ ھر ٹک یا قبیلہءِ مسترءِ بچ یا برات و یا یکے چہ نزیکان گون وتی
مردمان ھمراہ بوت کہ ھر ڈول وتی مردمانی ذمہ واراَت ـ اے دستہ ھر سال
چہ قبیلہءِ مردمان گچین بوت بلے بلوچ قبائل و غیرت مندین سرداران چہ اے
غم لشکرءَ و چہ سان بادشاہءَ رازی نہ اِتنت ـ پہ اے کارءِ ھاترا ھر کس
کہ جنگا شت چہ خان صاحبءِ نیمگا آیانی مالیات معاف بوت و پہ لاپ و
روزگارءِ ھاترا کشت و کشاری زمین دئیگ بوت اَنت، بلے سربلند و پرمڑاین
بلوچان قبول کت نہ کت کہ پہ درآمد و اجنبیانی ھاترا جنگ و کشگ ببنت ـ
پہ ھمے ھاترا قبائل چہ میرمحبت خان بد دل و بے مھر بوتگ اِتنت کہ مزنیں
میرنصیر خانءِ آیگا رَند پدّر بوت و احمدشاہ ابدالیءِ حلافءَ آزاتیءِ
جنگ بنگيج بوت ـ
میرمحبت خانءِ حکومت نزوراَت، آییءِ حکومتءِ زمانگا کراچیءِ بندن کہ
اولی میر مھراب خانءِ ھون بھا میرسمندرخانءَ رستگ اَت، سندءِ تالپورانی
دستءَ کپت ـ مکران وت سر بوتگ اَت، کم کم جام عالی بیلہءِ سردارءَ ھم
مالیاتءِ نیمءِ دیگا بند کتگ اَت ـ ماں کچی حسنی قبیلہ گون سردار
صادقءِ کماشیءَ پُل و پانچءِ بازار گرم کتگ اَت ـ پہ کچیءِ تاراج کنگا
سردار صادق مان تلیءِ دمگا منزل کتگ اَت و پُل و پانچ کنگا اَت، مری،
بگٹی، کھیتران، کچیءِ بلوچ قبائل و ڈیرہ جاتءِ نندوک چہ آییءِ پُل و
پانچءَ نالان اِتنت ـ بھرحال میرمحبت خانءِ حکومتیءِ زمانگا ھر نمیگا
بد امنیءِ آس شھم کشان اَت ـ راج چہ ھمک روچگیں دراج دستیان بیزار اَت
ـ تاجر و سوداگر پریشان اِتنت ـ پیشگيں خان و حاکم گون وتی ھندو رعیتان
سک باز وش رپتاراِتنت، وھدیکہ آیانءَ مال و زرّ پکار بوت، ھندوانی
مالانی پُل و پانچءِ بدلءَ چہ ڈنءَ شت و پُل و پانچ اِش کت و وتی خزانہ
اِش پُر کت ـ بلے میرمحبت خانءَ چشیں خزانہءِ مچ کنگءِ ھمت و جرات نیست
اَت ـ آیی وتی حرج و اخراجاتءَ کلاتءِ سوداگر و دکاندارانی سرا لڈاِتگ
اَت ـ واردات و صادراتءِ سرا مزنیں مالیاتے جتگ اِتی کہ پہ سوداگراں سک
گران اَت ـ میرمحبت خان ھندوانی سرا سک ظلم و گیشین کت و وتی خرج و
مخارجی چہ آیان پچ گپت ـ دکانداران چہ آییءِ زوراکیاں کلات ویل کت و
دگہ ھند و دمگاں شت اَنت ـ
چہ میرمحبت خانءِ نزوریان میرعبداللہ خانءِ پُر مڑاین حکومت برباد
بووگااَت ـ میرمحبت خان چہ سردارانی بیما وتی حرمسرایءِ تھا نشتگ و تاج
و تھت مُھر داشتگ اَت و قبائلی سرداران یک و یک چہ آیی بد دل و ناامیت
چترءِ سرا نشتگ اِتنت و گون وتی قبائلءَ گمنامین زندے گوازینگا اِتنت ـ
پنجگءِ واک مان قندھار ھنچو کہ جلادءِ شمشیرءَ بوت و نصیریءِ بھت و
اقبال مان کلاتءَ بلوچانی وابیں بھتءَ پچ دریھینت و آگاہ کت ـ
میرنصیرخان
اولی میرنصیرخان میرعبداللہ خانءِ کسترین بچ و میراھلتازخانءِ برات اَت
ـ میرمحبت خان چہ دگہ ماتے اَت ـ سال 1736ءَ وھدیکہ میراھلتازخان پہ
نادرشاہءِ حکمء قندھار شت، میرنصیرخانءَ گون وتی نہ برت ـ بلے ھمے
سالءَ کہ میراھلتازخان دزگیرکنگ بوت میرمحبت خان گون نادرشاہءِ حکمءَ
خان کلات گچین کنگ بوت ـ رند چہ اِش کہ میرمحبت خان پہ کلاتءِ خانیءَ
گچین کنگ بوت، آییءَ میرمراد علی، میرنصیرخان گون ماتءَ بندی کت و
نادرشاہءِ نیمگا قندھار دیم دات و تا سال 1745ءَ کساس نوہ سال
میرنصیرخان نادرشاہءِ زندانءَ بند بوت ـ زندانءِ وھدءِ اول سرا
میراھلتازخان پہ یک گپےءِ سرا گون میرنصیرخان، میرنصیرخانءِ دستءَ کشگ
بوت ـ نادرشاہ لوٹ اِت میرنصیرخانءَ میراھلتازخانءِ بدلی بکشیت ـ بلے
احمدزئی افغان شاھزادگان نادرشاہءَ پکا کت کہ میار میراھلتازخانءِ بوتگ
ـ میرنصیرخان چہ موتءَ رکئت ـ بلے شالکوٹءِ آمدنی کہ پہ میراھلتازخان،
میرنصیرخان و آییءِ ماتءِ لاپ و خرجءَ چہ میرمحبت خان پچ گرگ و آیانءَ
دئیگ بوتگ اَت، پدا نادرشاہ حکم دات کہ میراھلتازخانءِ ھون بھا میرمحبت
خانءَ دئیگ ببیت ـ رند چہ آیی میرنصیرخان و آییءِ مات و مردمانی زند پہ
گرانی گوست ـ بلے سالے رند بی بی مریم جرات کت نادرشاہءِ کرّا شت و
شالکوٹءِ آمدنی پہ وتی خرجءَ لوٹ اِت ـ نادرشاہ بی بی مریمءِ لوٹ من
اِت و شالکوٹءِ آمدنی آیانءَ دئیگ بوت ـ
وھدیکہ نادرشاہ ھندوستانءِ سرا اُروش کت میرنصیرخان سپاہ نادریءِ ھمراہ
اَت ـ اے نوہ سالءَ کہ میرنصیرخان نادرشاہءِ بندی اَت، چہ آییءِ
شخصیتءَ میرنصیرخان یک زحمت کش و مستقل مزاجیں انسانے جوڑ بوتگ اَت ـ
اے مدتءَ آییءَ شرین تجربہ اے رست کہ چہ ھمے تجربہءِ برکتءَ آیی مان
بلوچ و بلوچستانءِ تاریخ و راجدپترا شرین نام و ننگے واھند بوت ـ ھما
تجربہ ان میرنصیرخانا مان بلوچانی دلا حکومت کنگءِ ترز و تریکہءِ سکین
دات و بے مٹیں کامیابیانی واھند بوت ـ ھنچین حکومتی اے کہ بلوچانءَ مان
درستیں تاریخءَ نہ دیستگ اَت ـ میرنصیر خان ھر بلوچءِ دلءِ تھا جاگاہ
کتگ اَت ـ تا ھما ھدا کہ چہ آییءِ تاریخی فتوحات و کامیابیان کسہ و
داستان جوڑ بوت و ھمشی مئی کرّا آییءِ بزرگی و نام اِنت ـ بزرگیءِ
بابتءَ "گوتہ آلمانی شاعر گشیت": "انسانءِ بزرگی و حقیقت اِشی اِنت کہ
آیی مان کسہ و داستانان ببیت " میرنصیرخان وتی راجءِ تھا ھما درجہءَ
سربوتگ ـ مروچی ھم آییءِ بلوچانی تاریخءِ تھا رھشون و بھادر زانگ بیت و
تا مروچی آیی بلوچانی تھا نصیرخان بزرگ، نصیرخان ولی و نصیرخان نوریءِ
صفتان مشھور و گشگ بیت ـ
سال 1745 ءَ وھدیکہ نادرشاہ وتی وسرکزاتکءِ دستا کشگ بوت و آییءِ سپاہ
سالارا گرما گرم نادرشاہءِ لاشءِ سرا آییءِ وسرکزاتک بدلی کشت،
میرنصیرخان، گون شاہ ولی خان بامی زئیءِ کمکا گون وتی سنگت و ھمبلان چہ
قندھارءِ زندانا جست و شیراز شت ـ چہ اودان ملا مھرعلی داروغہءَ روانی
دات قندھار کہ آییءِ ماتءِ ھالءَ بگریت و وت گون میرکمال خان اھلتازئی،
میرسلطان زھرو بنگلزئی و علی دربار چہ مکرانءِ راہءَ گوست و حبءِ کورا
(جھالاوان) شت ـ بازیں مدتے ادا باھوٹ چٹہءِ مھمان بوت ـ باھوٹ چٹہ وتی
کساسءَ مھمانداری کت ـ مدتے رند میرنصیرخان دیم پہ سند شت و کلوڑانی
مھمان بوت، کساس دو سال سند خداآباد کلوڑانی گورا داشتی ـ
اے وھدا میرمحبت خان گون بلوچ سرداران ناوش اَت ـ میرنصیرخان چہ آیانی
ناوشیءَ فائدہ چست کت و سردار سلطان زھرو بنگلزئیءَ نپری کت و گون بلوچ
سرداران نامہ و پیغامءِ وڑا گپ و ترانءَ لگ اِت ـ سرداران کہ چہ
میرمحبت خان سک ناوش و بیزاراِتنت زوت گون میرنصیرخان تپاک بوت اَنت و
گوں آییءِ اِش بست ـ
ھمے دوران سپہ سالار احمدشاہ ابدالی مان افغانستان حکومتی کنگا اَت، و
شاہ ولی خان بامی زئی کہ میرنصیرخانءِ رھشون اَت و مدام گشتی کہ تو منی
بچءِ بدلءِ ، اے وھدا احمدشاہ ابدالیءِ وزیر اَت ـ میرنصیرخان پہ شاہ
ولی خان بامی زئی گاگد و کراچ کت و چہ شاہ ولی خانءِ نیمگا احمدشاہ
ابدالی میرنصیرخانءَ کمک کت ـ سال 1747 ءَ میرنصیرخان گون سردارانی
تپاکیءَ کاگدے نبشت و قندھار شت و احمدابدالیءَ داتَی، و تا سال 1749
ءَ ماں قندھار جلّ اِت ـ
سال 1749ءَ احمدشاہ ابدالی میرمحبت خانءَ مان قندھار دزگیر کت و
میرنصیرخان، خان کلات گچین و تاج سرا دئیگ بوت و گون بلوچانی ھمراھیءَ
دیم پہ کلات شت ـ درستین بلوچ سرداران مان کلات یکجاہ بوت اَنت و تاج
پوشیءِ دود و ربیدگ اِش ادا کت ـ
میرنصیرخان بلوچانی اولی حکومت اَت کہ جمھوری وڑیں حکومتی ٹھینتی و
بلوچانی دود و رسمءِ مطابقءَ آییءَ اصول جرگہ، مالی بنجاہ، راجی و جنگی
گل و سازمانانی بنیاد ایر کت اَنت ـ اے درستین اصول و راجی گل و یا دود
و ربیدگ کہ خاص مان کلاتءَ ھست اَنت، میرنصیرخانءِ جوڑ کتگین اَنت ـ اے
دگہ گپے کہ اگر آیانی اصلی دروشم بدل بوتگ ـ پہ میرنصیرخانءِ بلوچی
حکومتءَ و جنگي و ملکی زانگءَ گيشتر گپ و تران پکاراِنت ـ پہ اے ھاترا
کہ اے بھر و بانگان گھتر گیشینگ ببنت میرنصیرخانءِ خکومتیءِ دوران دو
بھر بیت ـ اولی بھر جنگی راہ و راھبندان، جنگان و آییءِ فتوحات گشگ بنت
و دومی بھر مُلکی گل، راجی و کومی اِتنت ـ
|
