balochistan_history8

تاریخ بلوچستان
نبیسوک: میرگل خان نصیر
رجانکار: ناصر محتشمی

میر محبت خان
اولی دور

میرعبداللہ خانءَ سے مردین چک ھست اَت ـ میرمحبت خان، میراھلتازخان و میرنصیرخان ـ توری میرمحبت خان میرعبداللہ خانءِ مسترین مردین چک اَت، بلے آییءِ مات جتے اَت، کہ بلوچان اے زاتا چہ وت کمتر و جھل تر زانت ـ پہ ھمے ھاترا بازیں سردارے پہ اے گپا کہ میرمحبت خان پہ خانیءَ گچین کنگ ببیت، تپاک نہ اِتنت ـ میراھلتازخان و میرنصیرخان بی بی مریمءِ چک اِتنت کہ چہ اھلتاززئی ٹکااَت ـ پہ اے ھاترا لھتے چہ سرداران گشت کہ میرمحبت خانءِ جاہءَ میراھلتازخان کلاتءِ خان گچین کنگ ببیت ـ بلے پہ اے ھاترا کہ میرعبداللہ خانءِ وتی جندا میرمحبت خانءَ گچین کتگ اَت و باز دوست اِتی سرداراں مجبور بوت اَنت کہ میرعبداللہ خانءِ واھشءِ احترامءَ بکن اَنت و سال 1731ءَ میرمحبت خان اِش کلاتءِ خان گچین کت ـ
میرمحبت خان چہ وتی براتاں شاکی اَت ـ وھدیکہ کلاتءِ خان بوت، گڈا میراھلتازخان و میرنصیرخانءَ گوں ماتءَ چہ کلاتءَ در کت اَنت و مستونگ دیم دات اَنت و مستونگءِ مالیات آیانی ھرجی دییگ بوت ـ

میرمحبت خان، جان دوست و بد زبانے اَت ـ گوں وتی سرداراں سخت گری کنگا بنگیجی کت ـ گڈا سکیں کسانیں وھدے بازینے چہ سرداراں آییءِ ھلاپ بوت اَنت ـ میرلشکری رئیسانیءِ سردارانی سروک اَت کہ چہ ھما اولا گوں اے گپا کہ میرمحبت خان کلاتءِ خان گچین کنگ ببیت تپاک نہ اَت و میراھلتازخانءِ پلہ مرز اَت ـ میرمحبت خانءِ سخت گریاں اے موہءَ میر لشکری رئیسانیءَ دات، اے درستیں سردار کہ چہ میرمحبت خان دلگران اِتنت، میراھلتاز خانءِ نیمگا روان بوت اَنت ـ وت ماں وت نشت و چیروکانی میرمحبت خانءِ تھتءِ پچ گرگءِ بندوبستءَ لگ اِتنت ـ
میرمحبت خان بدکار و سیہ کاریں مردے اَت ـ مدام نشتگ اَت و گوں جنینان وش گپی کت و گوں نوکراں چاپ و نازینکا دلگوش اَت ـ یا دربارءِ تھا گوں چنت ویلگرد و چاپلوسیں مردماں ھم دیوان اَت ـ سردار و قبایل بیزار اِتنت و نفرت کنگا لگ اِتنت و آییءِ چست کنگءِ آس شھم گران اَت، بلے آیی چہ اے درستیں گپاں ناسھی اَت ـ
میرلشکری سردارانءَ گوں وت ترّاینت و سال 1733ءِ اول سرا یک روچے چیروکانی کلاتءَ شت ـ میرلشکری میرمحبت خانءِ نزیکیں مردمانءَ زرّ دات و گوں وتی ترّاینت اَنت ـ ھمے ڈول ابید چہ اِش کہ یک پٹے ھون بہ رچیت کلاتءِ گرگءِ سازش برابر بوت و میرلشکری رئیسانی چیروکانی پدا دیم پہ مستونگ شت ـ میرمحبت خان چہ میرلشکریءِ بازیءَ یک کسانیں گپے ھم سرپد نہ اَت ـ چہ اے گپا زانگ بیت کہ آییءِ کَس و بمپانان تا چہ حد آییءِ وپادار بوتگ اَنت ـ آیی یک مزنیں بوجے وتی مردمانی سرا بوتگ اَت و اے موہ و وھدءِ پدا اِتنت کہ چہ وتی کوپگاں جھل دوری بدینت ـ

میرمحبت خانءِ دزگیری

وھدیکہ میرلشکری مستونگ سر بوت میراھلتازخان درستیں سردارانءَ پہ کلاتءِ گرگا جاڑی کت اَنت و پدا چنت روچا رند چیروکانی لھتے سردار گوں لھتے سوارا و ھور گوں میراھلتازخان زرت اَنتی و چہ مستونگ درآتک و عیدءِ شپءَ کلاتا پُج اِتنت ـ پہ اے ھاترا کہ میریءِ دربانان چہ پیشءَ سرپداِتنت کلاتءِ دروازگان اِش پہ آیاں پچ کت اَنت ـ آیاں کلاتءَ پترتنت و گوں گلام و نوکرانی رھشونیءَ میرمحبت خانءِ وابجاہءَ گوست اَنت ـ واجہ گرانیں وابے وپتگ اَت ـ پاداش کت و دزگیراِش کت ـ

کلاتءِ نندوکانی تظاھرات

اسکلکوءِ شاھوانیاں، منگوچرءِ لانگواں و کلاتءِ دھواراں میرمحبت خانءِ ھمراہ و پلہ مرزاِتنت ـ اے دگہ روچا کہ اِشاں سھی بوت اَنت کہ میراھلتازخان میرمحبت خانءَ دزگیر کتگ و کلات گپتگ، مچ بوت اَنت و میراھلتازخانءِ ھلاپءَ تظاھرات کنگا لگ اِتنت ـ میرلشکریءِ مردماں باز کم اِتنت و آیانءَ پہ کلاتءِ بمپانان ھم بازیں یکینے نیست اَت ـ ھبکہ بوت اَنت بلے عقل اے جاہءَ گوں میرلشکری ھمراھی کت ـ ھژاری و عاقلی کت، گوں تظاھرات کنوکانی سروکا نشت و گپ و ترانءَ لگ اِت ـ آسرا تظاھرات کنوکاں میرمحبت خانءَ ویل کت و شنگ و شانگ بوت اَنت ـ میرلشکری زوت میرمحبت خانءَ چہ کلاتءَ ڈن کت ـ ھمے وھدا میرلشکریءِ لشکر سربوت و کلات اِش امن کت ـ
میرمحبت خان چنت روچ اسکلکوءَ شاھوانیانی مھمان بوت و پدا شت وڈ، و میرلشکری ابید چہ یک پٹے ھونءِ ریچگا تھتءَ چہ میرمحبت خان پچ گپت و میراھلتازخانءَ دات ـ

میراھلتازخان

سال 1733ءِ اول سرا میرلشکری رئیسانی سازش کت و میرمحبت خانءِ گرپتاریءَ رند، کلات تظاھرات کنوکانءَ دستا دئیگ بوت ـ اے دگہ روچا چہ مستونگ کمک رس اِت، گوں سرداراں نشت اَنت و میراھلتازخان اِش کلاتءِ خان کت ـ
بلے میراھلتازخان ھم سک زوت چہ سردارانی نظران کپت ـ پہ اے ھاترا کہ آیی ھم وتی براتءِ، میرمحبت خانءِ وڑا سکیں، زدی، کوتہ پگر، سیہ کار و کم زانتے اَت ـ وھدیکہ کلاتءِ خان بوت چہ سرداراں وتا دوری داشت و آ کول و تماھاں کہ داتگ اِتنتی شموشت اَنتی ـ
تا اے وھدا آییءَ میرعبداللہءِ وڑیں لشکرے نیست اَت کہ سرداران چم بجن اَنت، کوششی کت کہ پہ زور سردارانءَ بترسینیت و حکومتی بکنت ـ بلے اے وھدا واکمند و آزات ھیالیں سرداران میراھلتازخانءِ وتسریانءَ اوپار کت نہ کت ـ وھدیکہ آیان دیست کہ میراھلتازخان ھیران اِنت، آیاں ھم وتی دستانءَ لانچ اِت ـ میرمحبت خان کہ وتا تھتءِ واھند زانت، مان وڈ نشتگ اَت ـ قبایلی واک سردارانی دستا اَت ـ میراھلتازخان بس پہ نام کلاتءِ خان اَت ـ
میرلشکری رئیسانی و دگہ لھتے سردار کہ آییءِ ھمراہ اِتنت و باز کم اِتنت انگت گوں میراھلتازخان ھوراِتنت ـ میرلشکری یک تجربہ کار و دانایں مردے اَت ـ آیی میراھلتازخانءَ باز نصیحت کت کہ اے وھدا ناوش بیگ گوں سرداران شریں کارے نہ اِنت و آییءَ گشت کہ ھر قول و تماھے کہ تو سردارانءَ داتگ برابراِش بکن، بلے آییءِ شریں سوج و مشورہ پہ کم زانتیں میراھلتازخان ھچ ڈول کارگیر نہ بوت اَنت، ابید چہ اے سرداران گوں مھلوکا ظلم و زور کنگا لگ اِت ـ چہ اے کارا سردارانی واک گیشتر بوت ـ

میرلشکریءِ گُڈی جھد

وھدیکہ میرلشکری دیت کہ آییءِ درستیں جھدان بے نپ اَنت آرام نشت کتی نہ کت ـ پہ میراھلتازخانءِ سرکچ دیگا وتی گڈی جھدی کت ـ یک شپے چیروکانی میراھلتازخانءِ کِرّا شت و درستیں گپانی گوں آیی گشت اَنت ـ گون آیی گشتی کہ میرمحبت خان سلیں سازشے تئے ھلاپءِ چن و لانچ کنگااِنت ـ درستیں سردارانے کہ چہ تو دلگران اَنت گوں میرمحبت خان بستگ اِش، انگت دیر نہ اِنت، کینگ و کستانا ویل کن ـ گوں آیاں بہ نند و وش اِش بکن، تا کہ میرمحبت خانءَ ویل بکن اَنت و پدا تئی نمیگا بیاینت ـ پدا میرلشکری گوں آیی گشت اے شریں وھدے، چہ اے وھدا سوب چست بکن، و اے ڈول ھم گشتی اگر اے کارا نہ کنے گڈا دگہ یک آھری راھے پشت کپتگ ـ آھری راہ اِشی اِنت کہ باید میرمحبت خانءَ بہ کشءِ تا کہ اے سازشانی ریشگ ھشک ببیت ـ
بلے میرلشکریءِ اے شریں سوج و رھشونیاں ھچ پیم پہ میراھلتازخان اثرمند نہ بوت اَنت و دومی روچا وھدیکہ دربار پُر چہ مردم اَت، آییءَ میرلشکریءِ درستین گشتگین گپ گوں نندوکاں گشت و پاشک کت اَنت ـ میرلشکری چہ اے گپا سک پہ درد بوت و دومی روچا شت کانک، و رند چہ مدتے پدا کلاتءَ پچ ترّاِت ـ

میراھلتازخانءِ لوٹاینگ ماں قندھار

وھدیکہ میراھلتازخان قندھار رس اِت نادرشاہءِ اطاعتی منّت ـ نادرشاہ چہ اے کارا وش بوت و شاھی پوشاکے میراھلتازخانءَ داتی ـ بلے اے دگہ روچا میرمحبت خان گوں سرداراں نادرشاہءِ کِرِِّا شت و میراھلتازخانءِ ھلاپءَ درخواستے پیشی کت و گشتی کلاتءِ ھکیکتیں وارث من بزاں میرمحبت خان اِنت، و گشتی کہ میراھلتازخانءَ منا رد داتگ کلاتءِ تھتی پہ رپک چہ من پچ گپتگ ـ نادرشاہ چہ اے دگہ سرداراں جست کت، درستین سرداراں شاھدی دات بزاں ھر چہ کہ میرمحبت خان گشگااِنت ھما ڈول بوتگ، و اے گپ اِش ھم گشت کہ میراھلتازخانءِ بستار اینچو نہ اِنت کہ حکومتی بکنت و سکیں ظالمے ـ گوں چنت وتواہ و کم زاتیں کسءَ نشتگ و درستیں ملک برباد اِنت ـ نادرشاہ میرمحبت خان و سردارانی شکایتءَ گوش کت اَنت و میراھلتازخانءَ جست و پرسی کت ـ بلے پہ آیی ابید چہ میرکمال خان اھلتاززئی و سلطان زھرو بنگلزئی دگہ دوست ھمراہ در نیاتک ـ آسرا نادرشاہ میرمحبت خانءَ کلاتءِ ھکدار زانت و میراھلتازخان یک گور کنگ بوت ـ

پدا میرمحبت خان کلاتءِ خان کنگ بوت

نادرشاہ گون بلوچ سردارانی ھمراھیءَ میرمحبت خانءَ کلاتءِ خان مقرر کت و شاھی پوشاکی گورا دات و گوں آییءِ گشگا میرکمال خان اھلتاززئی، سردارسلطان بنگلزئی، علی دربان، ملا مھر علیءَ گوں میراھلتازخان گپت و قندھارءِ کلاتءَ نظر بند کت اَنت ـ
میرمحبت خان چنت روچ نادری دربارا داشت ـ نادرشاہ چہ آیی سک وش بوت و پنچ سد سوار گوں لطف علی ایرانیءِ سروکیءَ آییءَ دیگ بوت و پہ کلاتءِ روگا مرھز کنگ بوت ـ بلوچانی تاریخءِ تھا اے روچ شوم تریں روچ اَت، پہ اے ھاترا کہ یک درآمدیں حکومتےءِ زلم و زور پہ مدامی ماں آزات ھیالیں بلوچانی گردنءَ کپت ـ
وھدیکہ میرمحبت خان تھتءِ سرا نشت، میرنصیرخان و آییءِ مات بی بی مریم و میراھلتازخانءِ بچ میرمرادعلیءَ گپت اَنتی و گوں سپہ سالار لطف علی ایرانی قندھار نادرشاہءِ نیمگا راہ دئیگ بوت اَنت و شالکوٹءِ دمگانی مالیات پہ آیانی لاپ و حرجءَ نادرشاہءَ دئيگ بوت ـ

میراھلتازخانءِ کشگ

میراھلتازخان و میرنصیرخان تا دو سالا ماں قندھار، نادرشاہءِ کمپءَ نظربند بوت اَنت ـ سال 1738 ءِ اول سرا یک روچے دوئین براتاں پہ یک ھبرے وت ماں وت اڑاِتنت ـ میراھلتازخان ھژم گپت و کش اِتی زھما کہ میرنصیرخانءَ بجنت، بلے میرنصیرخان آییءِ نزیکا اوشتاتگ اَت، آیی ھم وتی زھمءَ کش اِت و میراھلتازخانءِ لاپءَ جتی ـ میراھلتازخانءِ لاپ دِرت و روتانی در آتک اَنت، کپت و جاہ پہ جاہ مرت ـ